மாவட்ட செயற்குழு

    29.09.2020 அன்று காலை நமது கடலூர் மெயின் தொலைபேசி நிலையத்தில்  உள்ள CONFERENCE ஹாலில் மாவட்ட செயற்குழு தோழர் K. அம்பாயிரம்  மாவட்ட துணைத் தலைவர் அவர்களின்  தலைமையில் மிகச் சிறப்பாக  நடைபெற்றது . மாவட்ட செயற்குழுவின் முதல் நிகழ்வாக நமது சங்க கொடி ஏற்றப்பட்டது.  சங்க  கொடியினை நமது தோழர் L.ராமசேகரன் TT/CDL அவர்கள் ஏற்றி வைத்தார் விண்ணதிரும் வகையில்  தோழர் E.விணாயகமூர்த்தி  அவர்கள் கோஷமிட பலர் கலந்து கொண்டு கோஷமிட்டனர். காலை 10.00 மணியளவில் மாவட்ட செயற்குழு திட்டமிட்டப்படி  துவங்கியது. செயற்குழுவிற்கு வந்திருந்த அனைத்து மாவட்ட சங்க, கிளைச் சங்க நிர்வாகிகளை வரவேற்றார்.

COVID-19 காலத்தில் இயற்கை எய்திய நமது தோழர்கள், விருப்ப ஓய்வு பெற்ற தோழர்கள், ஓய்வு பெற்ற தோழர்களுக்கு அஞ்சலி செலுத்தப்பட்டது.  அடுத்தபடியாக நமது மாவட்ட செயலர் தோழர்  D. குழந்தைநாதன்  துவக்கவுரையாற்றினார். ATT/TT  மாற்றல், நிர்வாகத்தின் அணுகுமுறை  ஆகியவற்றினை  குறித்து  பதிவு செய்தார்.         

மாவட்ட செயற்குழுவில்  வந்திருந்த மாவட்ட சங்க  பொறுப்பாளர்கள், கிளைச் சங்க தோழர்கள் அனைவரும் தங்களது கருத்துக்களை பதிவு செய்தனர்.  தோழர் V.லோகநாதன் மாநில துணைத் தலைவர் மற்றும் தோழர் P. சுந்தரமூர்த்தி  மாநில உதவிச் செயலர் ஆகியோர்  செயற்குழுவினை வாழ்த்தி பேசினார்கள். இறுதியாக நமது மேனாள் மாவட்ட செயலர் தோழர் இரா.ஸ்ரீதர்  தனது உரையில்  நமது BSNLலின் இன்றைய   நிலையையும் , நாம் செய்ய வேண்டிய கடமைகளையும், நமது  மாநில, மத்திய சங்கங்களின் செயல்பாடுகளை பற்றியும் விரிவாக பதிவு செய்தார். ஆளும் அரசின் கோர பிடிக்குள் இருக்கும் நமத் துறையினை பாதுகாத்திட நாம் இன்னும் வேகமாக செயலபட வேண்டும் என பதிவு செய்தார்.

        இறுதியாக நமது மாவட்ட பொருளார் தோழர் A.S.குருபிரசாத்  நன்றி நவில மாவட்ட செயற்குழு இனிதே முடிவுற்றது.

29.09.2020 மாவட்டச் செயற்குழுவில் நிறைவேற்ற முன்மொழியப்பட்ட நகல் தீர்மானங்கள்

• v ஊழியர்களின் அடையாள அட்டை மற்றும் மருத்துவ அடையாள அட்டைகளின்  காலக்கெடு  முடிந்துவிட்டதால் உடனடியாக அவற்றை மாற்றி ஊழியர்களுக்குப் புதியதாக அடையாள அட்டைகள் வழங்கிட நடவடிக்கை எடுக்கும்படி மாவட்ட நிர்வாகத்தை இந்த மாவட்டச் செயற்குழு கேட்டுக் கொள்கிறது.

v ஊழியர்கள் அவசர காலத்தில்  மருத்துவமனையில் உள்நோயாளியாக அனுமதி பெறுவதில் தற்போது பெரும் இடர்பாடுகளைச் சந்திக்க நேர்கிறது. கோவிட்-19 பாதிப்புக்கான சிகிச்சை எனில் அனுமதி இல்லை என்பதே எதார்த்தம். அனுமதி மறுக்கப்படுவதற்கு மருத்துவமனைகளின் பில்களைப் பட்டுவாடா செய்ய BSNL நிர்வாகம் தாமதிப்பதே காரணமாகும். இந்நிலையில் குறைந்தபட்சம் ஊழியர்கள் தாங்களே பணத்தை செலுத்தும் வகையில் (Not on MRS Credit Based) அவசர காலத்தில் BSNL ஊழியர்களுக்கு முன்னுரிமை அடிப்படையில் மருத்துவமனை உள்நோயாளியாக அனுமதி பெறும் வகையில், சில குறிப்பிட்ட மருத்துவமனை நிர்வாகங்களோடு BSNL மாவட்ட நிர்வாகம் பேச்சுவார்த்தை நடத்தி, மாவட்ட ஊழியர்களுக்கான அத்தகைய மருத்துவமனைகளை ஒப்பந்தம் செய்து அறிவிக்க வேண்டும் என இச்செயற்குழு மாவட்ட நிர்வாகத்தினை வற்புறுத்திக் கேட்டுக் கொள்கிறது.

• v ஓய்வு பெற்ற ஊழியர்கள் / பணியில் இருக்கும் ஊழியர்களின் மருத்துவ பில்களைப்  பட்டுவாடா செய்வதில் விரைந்து நடவடிக்கை எடுத்திட வேண்டும் என இச்செயற்குழு கேட்டுக் கொள்கிறது.
• v கடலூர் மெயின் தொலைபேசி நிலையம், திருப்பாதிரிப்புலியூர், சிதம்பரம் தொலைபேசி நிலையத்தில் இருக்கும் BSNL–OLTகளைப் பயன்படுத்தி    இயங்கும் FTTH குழுக்களைக் கலைக்காமல், அந்தக் குழுக்கள் மூலமாகவே புதிய இணைப்புகளை BSNL நிர்வாகமே வழங்கிட வேண்டும் என இச் செயற்குழு கேட்டுக் கொள்கிறது.
• v COVID-19 காலத்தில் தொழிற்சங்கங்கள் தரும் ஆலோசனைகளை / ஒத்துழைப்பை மாவட்ட நிர்வாகம் நம்பிக்கையோடு அணுகுவதற்கு மாறாக முரண்பாடாக நடந்து கொள்வதையும், ஒப்புக்கொண்டவற்றையும் கூட தன்னிச்சையாகக் கைவிடுவதையும் இச்செயற்குழு வருத்தத்தோடு சுட்டிக் காட்டுகிறது.
• v ஊழியர்களைத் தொடர்ந்து பணியிடம் மாற்றும் நிர்வாகத்தின் போக்கை செயற்குழு வன்மையாகக் கண்டிக்கிறது. உரிய திட்டமிடல், தலமட்ட அதிகாரிகள் மற்றும் தொழிற்சங்கங்களுடன் வெளிப்படையான கருத்துப் பரிமாற்றம் இல்லாததே திட்டமில்லா திடீர் திடீர் மாறுதல் உத்தரவுகளுக்குக் காரணம். இது சேவையை மேம்படுத்த உதவாது, கைவிட வேண்டும் என நிர்வாகத்தை இச்செயற்குழு வேண்டுகிறது.
• v ஒப்பந்த ஊழியர்களும் நிரந்தர ஊழியர்களோடு இணைந்து, நிறுவனத்தின் வளர்ச்சிப் பணிகளைத்தான் செய்து வருகிறார்கள். எனவே, ஒப்பந்த ஊழியர்களின் பிரச்சனைகளில் மாவட்ட நிர்வாகம் மனிதாபிமானத்தோடு நடக்க வேண்டும் என இச்செயற்குழு விழைகிறது.
• v CLUSTER –OUTSOURCING நடைமுறை குளறுபடிகளைத் தீர்த்திட மாவட்ட நிர்வாகம் உரிய நடவடிக்கை எடுத்திட இச்செயற்குழு கேட்டுக் கொள்கின்றது. அதிகரிக்கும் லைன் பழுதுகள், மற்றும் தொலைபேசி இணைப்பு சரண்டர்களைக் குறைக்க, இந்த நடைமுறையின் அமலாக்கம் உரிய ஆய்வுக்கு உட்படுத்த வேண்டும். ஒப்பந்ததாரர்கள் செயல்திறனைக் கண்காணிக்கப் பகுதி வாரியாகப் பொறுப்பு அதிகாரிகள் நியமித்து அறிவிக்க வேண்டும் எனவும் இச்செயற்குழு கேட்டுக் கொள்கிறது.
• v இது வரையில் எந்தெந்தப் பணிகள் ஒப்பந்ததாரர்களுக்கு விடப்பட்டுள்ளது என்பதனை  மாவட்டச் சங்கங்களுக்குத் தெரிவிக்க வேண்டும் என இச்செயற்குழு நிர்வாகத்தைக் கேட்டுக் கொள்கிறது.
• v தேசியக் கவுன்சில் கூட்டம் அறிவிக்கப்பட்டுள்ள நிலையில், மாவட்ட மட்டத்திலான ஜெசிஎம் கூட்டாலோசனைக் குழு மற்றும் Works’ Committee கூட்டங்களை நமது மாவட்டத்தில் அமைத்து நடத்துவதற்கு மாவட்ட நிர்வாகம் விரைவில் நடவடிக்கை எடுத்திட இச்செயற்குழு வற்புறுத்துகிறது.
• v ஊழியர்களுக்கான ஆண்டு ரகசியக் குறிப்புகள் (Confidential Reports) உரிய மேற்பார்வை அதிகாரிகளால் எழுதப்பட்டு பணி முடிக்கப்பட்டதை நிர்வாகம் உறுதி செய்யவும், அக்குறிப்புகளை விதிகளுக்கு ஏற்ப ஊழியர்கள் பார்வைக்கு வழங்கவும் விரைவில் நடவடிக்கை எடுக்க மாவட்ட நிர்வாகத்தை இச்செயற்குழு கேட்டுக் கொள்கிறது.

v மேற்கண்ட தீர்மானங்கள் கொண்டு வருவதற்குத் தற்போதைய மாவட்ட நிர்வாகத்தின் உதவிகரமற்ற அணுகுமுறையே காரணம். விஆர்எஸ் அமலாக்கத்திற்குப் பிறகு நிர்வாகம் ஒரே DGM அதிகாரத்தின் கீழ் வந்து விட்டது. தலைமைப் பொறுப்பில் உள்ள மாவட்டப் பொது மேலாளரும் புதுவையிலிருந்து வருகைதரும் அதிகாரியாக உள்ளதால் அன்றாட நிர்வாகம் ஓர் குடையின் கீழ் என்ற நிலையில் உள்ளது. எனவே சேவை குறைபாடாக இருந்தாலும், ஊழியர்கள் பிரச்சனைகள் என்றாலும் பொறுப்பு அவரையே சார்ந்தது. எனவே அவரது அணுகுமுறையில் மாற்றம் ஏற்பட வேண்டும் என்பது அனைவரது விழைவு மட்டுமல்ல, மாவட்டப் பொதுமேலாளருக்கு இச்செயற்குழுவின் வேண்டுகோளும் ஆகும். இல்லையெனில் மாவட்டதின் தொழில் அமைதி பாதிக்கப்படும் என்பதை மிகுந்த பொறுப்புணர்வோடு NFTE தொழிற்சங்கத்தின் இம்மாவட்டச் செயற்குழு சுட்டிக்காட்டுகிறது.    

Print Page

கண்ணீர் அஞ்சலி

  திண்டிவனம் தோழர் G.ஜெயச்சந்திரன் JE அவர்களின் தாயார் திருமதி காமாட்சி கணேசன் அவர்கள் இன்று அதிகாலை 3.00 மணியளவில் உடல்நிலை சரியில்லாத காரணத்தினால் (கொரொனா டெஸ்டில் நெகட்டிவ்) இயற்கை எய்தினார் என்பதை ஆழ்ந்த வருத்தத்துடன் தெரிவித்துக்கொள்கிறோம். அம்மையாரது பிரிவில் வருந்தும் தோழருக்கும் அவர்தம் குடும்பத்தினருக்கும் கடலூர் மாவட்ட சங்கத்தின் ஆழ்ந்த இரங்கலை தெரிவித்துக் கொள்கிறோம்.

அவரது நல்லடக்கம் சென்னை
கூடுவாஞ்சேரி காயரம்பேடு  கிராமத்தில் இன்று மதியம் 2 மணி அளவில் நடைபெறும்.
*கடலூர் nfte-bsnl மாவட்ட சங்கம்*

வாழ்வாதாரம் காத்திட நிதியளிப்போம்!

வாழ்வாதாரம் காத்திட நிதியளிப்போம்!

    அன்புள்ள தோழர்களே!

ஒப்பந்த ஊழியர்களாகிய நாம் பத்து மாதமாகச் சம்பளம் வழங்கப்படாமல் பணியாற்றி கொண்டிருக்கின்றோம். சம்பளம் வழங்குவதில் அக்கறையற்று இருக்கும்  மாநில நிர்வாகத்தின் இந்தப் போக்கை மாற்றிட TMTCLU  மாநிலச் சங்கத்தின் சார்பில்  சென்னை உயர்நீதி மன்றத்தில் வழக்கு தொடரப்பட்டது.

     வழக்கின் சென்ற விசாரணை13.08.2020ல் நடந்தபோது, சென்னை உயர்நீதி மன்றம்  மாநில நிர்வாகத்திற்குச் சில அறிவுறுத்தல்கள் வழங்கியது. (அந்த உத்தரவுகளின் தமிழாக்கம் நமது தொழிற்சங்கக் குழுக்களில் வெளியானது). அந்த உத்தரவில், 30% சம்பளம் வழங்கிவிட்டதாகக் கூறும் நிர்வாகம் அதற்கு ஆதாரமான ஆவணங்களைத் தாக்கல் செய்யவும், மீதியுள்ள 70% சம்பள பாக்கினை முழுமையாக ஒப்பந்த ஊழியர்களுக்குத் தாமதமின்றி வழங்கச் செப்டம்பர்  22ந் தேதி தயாராக  இருக்க வேண்டும் எனவும் வலியுறுத்தியுள்ளது. ஒப்பந்தத் தொழிலாளர்களுக்கு முழுமையாக சம்பளம் கிடைப்பதற்கான நல்ல சுழல் உருவாகி உள்ளது.

           இந்த வழக்கு சம்மந்தமாகத் தொடர்ந்து தொழிலாளர் நலனில் அக்கறையுடன் செயல்படும் நமது மாநில பொதுச் செயலர் தோழர் R.செல்வம் அவர்களுக்கும், வழக்கிற்கான செலவுத் தொகையை நாம் இன்னும் கொடுக்கவில்லை எனினும், தொடர்ந்து அக்கறையுடனும் உத்வேகத்துடனும் செயல்படும் நமது சட்ட ஆலோசகர் N.K.சீனிவாசன் அவர்களுக்கும் நமது சங்கத்தின் சார்பில் நன்றியைத் தெரிவித்துக் கொள்கின்றோம்.

     சென்னை உயர்நீதி மன்றத்தில் நமது வழக்குகள் செப்டம்பர் -22 ந் தேதி வரவுள்ளதால் வழக்கு செலவிற்கான தொகையை  நாம் கொடுக்க வேண்டும். அதன் முதற்கட்டமாக நமது கடலூர் TMTCLU  மாவட்டச் சங்கத்தின் சார்பில் ரூ3000/- பொதுச் செயலர் தோழர் R.செல்வம் அவர்களிடம் வழங்கப்பட்டுள்ளது.

               உயர்நீதி மன்றத்தில் தொடர்ந்து வழக்கினை நடத்துவதற்கு (ஆவண நகல்கள் ஜெராக்ஸ், முத்திரைக் கட்டணம் முதலிய வகையில்) பெரும் செலவு ஆகிறது. நமது நாட்டின் நீதிமன்ற நடைமுறை அவ்வாறு.  ஆகவே நமது ஒப்பந்த ஊழியர்களும் வழக்கு நடத்துவதற்கான தங்களின்  பங்களிப்பாகத் தங்களால் முடிந்த அளவில்  தலா ரூ 100/-ஐ வழங்கிடமாறு தோழமையுடன் கேட்டுக் கொள்கின்றோம்.  இது மிகவும் அவசியமும் மிக அவசரமும் கூட.

     ஓய்வு பெற்ற  நல்ல மனம் கொண்ட அதிகாரி பெருமக்கள், ஊழியர்கள் தங்களால் முடிந்த அளவில் நிதி தருமாறு கேட்டுக் கொள்கின்றோம். இதற்கு முன்பும் அவர்கள் நம்மீது அக்கறை கொண்டு பல தருணங்களில் நிதி அளித்திருக்கிறார்கள் என்பதை நாம் நன்றியோடு நினைவில் கொண்டுள்ளோம். தொழிலாளர் நலனில் அக்கறையோடு செயல்பட்டுக் கொண்டிருக்கும்  தொழிற்சங்கத் தலைவர்களையும், கிளைச் சங்க நிர்வாகிகளையும், மாநில, மாவட்டச் சங்க பொறுப்பாளர்களையும்  அன்புடன் கேட்டுக் கொள்கின்றோம்,, தங்களால் ஆன நிதி உதவினை வழங்கி, ஒப்பந்த ஊழியர்களின் வாழ்வாதாரத்தினைக்  காத்திட, தாமதமாகும் நீதியினைப் பெற, வழக்கில் வெல்ல  உதவுங்கள் தோழர்களே!

       தோழர்கள் தங்கள் நன்கொடையினை கடலூர் TMTCLU  மாவட்டச் சங்கத்திடம் விரைந்து வழங்கிட வேண்டுகிறோம். பிற மாவட்டத் தோழர்கள் தோழர் M.விஜய் ஆரோக்யராஜ், TMTCLU  மாநிலப் பொருளாளர் அவர்களுக்கு அனுப்பி வைக்குமாறு  கேட்டுக் கொள்கின்றோம் .

         சென்னை உயர்நீதி மன்றம் ஒப்பந்த ஊழியர்கள் விபரங்கள் அடங்கிய UAN பட்டியல் கோரியுள்ளது. ஆகவே ஒப்பந்த ஊழியர்கள் அனைவரும்  தங்களது  UAN சம்மந்தமாக  விபரங்களைப் பொதுச் செயலரிடம் விரைந்து கொடுக்குமாறு  கேட்டுக் கொள்கின்றோம்.

தோழமையுடன்

    M.S.குமார்              A.S.குருபிரசாத்                 J.கந்தன்

மாவட்ட தலைவர்         மாவட்ட செயலர்          மாவட்ட பொருளாளர்